Mbinu za kumhujumu Rais Kikwete zafichuliwa.....Sitta atoa onyo kali kwa wataothubutu kumzomea Rais....

  

BAADHI ya wajumbe wa Bunge Maalum la Katiba wamewaonya wenzao ambao wamepanga kumzomea Rais Jakaya Kikwete wakati akitarajiwa kulihutubia bunge hilo kesho.

 

Onyo hilo walilitoa jana mjini Dodoma wakati wa semina maalum ya kupitia kanuni za bunge hilo, iliyofanyikia katika ukumbi wa Bunge.

 

Akichangia katika semina hiyo mmoja wa wajumbe hao, James Mbatia, alionya taarifa za kuwepo kwa mkakati wa kupanga kumzomea Rais Kikwete, atakapolihutubia Bunge kesho.

 

Mbatia alisema, Rais anaongoza watu wote, ingawa ana chama cha siasa kwa mujibu wa sheria hivyo ni lazima asikilizwe.

 

“Tumesikia wapo wenye mkakati wa kumzomea Rais atakapokuja hapa,” alisema Mbatia.

 

Aliwataka wajumbe wenzake waache fitina, kuzomeazomea na badala yake wavumiliane ili waweze kuvuka salama huku akisisitiza kuwa, kauli ya umma ni kauli ya Mungu.

 

Kwa upande wake Mwenyekiti wa Bunge hilo, Samuel Sitta, alionya vinara wa fujo na kusisitiza kuwa hawataachwa salama kwani kuna kamera maalumu ambazo zitatumika kukusanya ushahidi.

 

“Kamati ya Kanuni Madhubuti zitafanyakazi na hatutakubali kuahirisha Bunge huku watu wakilipwa posho,” alisema Mwenyekiti huyo.

 

Alisema, ndani ya Bunge hilo kuna kamera 12 ambazo zinanasa kila tukio, hivyo ushahidi huo utakusanywa na kuupeleka kamati ya maadili kwa ajili ya uamuzi.

 

Mbali na hayo Mwenyekiti huyo hakusita kutamka wazi kuwa ndani ya Bunge hilo kuna vinara wa vurugu ambao watahakikisha wanashughulikiwa pindi watakapojitokeza wakati Rais Kikwete akihutubia.

 

Naye Julius Mtatiro ambaye ni miongoni mwa wajumbe wa bunge hilo alisema, hatarajii kama kuna mtu yeyote anayetaka kufanya jambo lolote.

 

Alisema, Rais ana dhamira nzuri na mchakato wa kuwapatia Watanzania Katiba Mpya, hivyo hatarajii jambo jingine lolote zaidi ya kumsikiliza Rais Kikwete.

 

Wakati huo huo, Mtatiro alitolea mfano alivyotukanwa matusi mabaya na mmoja wa wajumbe pale alipokuwa akisimama na kupiga meza.

 

Alisisitiza kwamba, kila mmoja aelewe kuwa wapo bungeni hapo kwa ajili ya kutunga Katiba ambayo ni tendo la maridhiano na maelewano na wajumbe waweke hilo mbele.

 

Akijibu hilo, Mwenyekiti wa bunge hilo, Sitta alisema kusimama na kupiga meza huo nao ni udikteta, kwani mjumbe haruhusiwi kusimama bila kuruhusiwa.

 

Sitta, alisema hatavumilia udikteta wa aina yoyote uwe wa wengi au wachache.

 

Wakati huo huo, Kada wa siku nyingi wa CCM na Mjumbe wa Bunge la Katiba, Kingunge Ngombale Mwiru, amesema Tume ya Mabadiliko ya Katiba, iliyoongozwa na Jaji Joseph Warioba, imeshindwa kuweka misingi ya kujenga muungano badala yake inataka kuuvunja.

 

Kingunge ametoa kauli hiyo ikiwa ni siku moja baada ya Jaji Warioba kuwasilisha Rasimu ya Pili ya Katiba katika Bunge la Katiba Mjini Dodoma, huku akiendelea kutetea msimamo wa Tume yake wa kupendekeza muundo wa Serikali tatu.

 

Akihojiwa jana katika kipindi cha Jambo Tanzania kinachorushwa na Kituo cha Utangazaji cha Televisheni ya Taifa (TBC1) Kingunge, alisema mahali popote alipo binadamu lazima kuwepo kero na changamoto.

 

Hata hivyo alisema changamoto hizo haziwezi kuvunja muungano. Alitoa mfano akisema kwa nchi za Afrika, Tanzania ni nchi ya kuigwa kutokana na kuwa kisiwa cha amani.

 

Kingunge alisema ameshangazwa na Tume ya Mabadiliko ya Katiba kutoa mapendekezo bila kuangalia matokeo ya muundo ambao utasambaratisha uzalendo.

 

"Tume wao wamemaliza kazi yao wameandika maandishi mengi, lakini Bunge Maalum la Katiba ndilo linalochagua Katiba ambayo itapendekezwa na wananchi," alisisitiza Kingunge.

 

Aliwataka wajumbe wa Bunge hilo kutuliza vichwa vyao, kwani rasimu hiyo haiandikwi na wajumbe wala chama chochote na kwamba hakuna mtu anayeweza kwenda Ikulu bila kuchaguliwa na wananchi.

 

Kada huyo wa CCM aliwataka Watanzania kuwa makini na watulivu na kuliachia Bunge tukufu kazi ya kutunga katiba kwani ndilo linawakilisha wananchi na Serikali.

 

Alishauri Watanzania watulie na kuangalia Katiba ambayo imeachwa na waasisi kwa miaka 50 imeleta mafanikio gani. Alisema Tanzania ni Taifa kubwa na lengo la kupigania uhuru ni kuungana kumuondoa mkoloni.

 

"Katiba mpya kwanza tukubaliane si mradi kupata katiba, tuwe na lengo la kupata katiba iliyo bora na kabla ya kupata hiyo mpya tuangalie katika miaka ya 50 tumeweza kupata mafanikio makubwa kiasi gani kwa Katiba ya zamani chini ya mwasisi Mwalimu Julius Nyerere," alisema.

 

Kwa upande wake Mjumbe wa Bunge la Katiba kutoka Serikali ya Mapinduzi Zanzibar, Pandu Amir Kificho, alisema kama mwakilishi wa Serikali ya Zanzibar wanapendekeza Serikali mbili.

 

Kificho alisema jambo la Muungano limedumu ndani ya miaka 50 na lengo kuweka muungano uliyo bora zaidi, lakini changamoto zilizokuwepo ingetumika utaratibu wa kuziondoa kwa ajili ya kuimarisha ushirikiano.

 

"Mimi kama mwakilishi kutoka Zanzibar tunachagua Serikali mbili na katika Bunge hili kuna Wawakilishi kutoka Zanzibar wa CCM na CUF wanataka Serikali mbili ziweze kuendelea kama msimamo wao wa Baraza la Wawakilishi wa CCM," alisema.

 

Alisema kuundwa Serikali tatu ni mzigo na zitaleta machafuko hatimaye kuyumba. Alisema katika nchi tatu moja ikiyumba, lazima idondoshwe.

 

"Naitupia lawama Tume ya Rasimu ya Katiba kwa kupendekeza na kuchagua Serikali tatu halafu katika rasimu yao hawajaelezea faida ya kuchagua Serikali tatu au Serikali mbili, jicho lao alijaangalia mbele,"alisema

 

Wakati huo huo, Jumuiya na Taasisi za Kiislamu nchini imeunga mkono muundo wa Serikali tatu zilizopendekezwa na Tume ya Jaji Warioba katika Katiba mpya.

 

Akizungumza na waandishi wa habari Jijini Dar es Salaam jana, Msemaji Mkuu wa Taasisi hiyo, Rajabu Katumba, alisema ni vyema zikawepo Serikali tatu ya Tanganyika, Zanzibar na Serikali ya Muungano.

 

Alisema kuwepo kwa Serikali hizo kutatatua kero nyingi zinazojitokeza katika kipindi hiki cha uwepo wa Serikali mbili. Alisema Serikali ya Tanganyika na Zanzibar zijitegemee wakati ile ya Muungano iwe na Rais wa Muungano atakayeratibu na kusimamia makubaliano ya muungano huo.

Aidha alisema Katiba Mpya ya Serikali tatu ni muhimu pia izingatie kero za waislamu zilizodumu kwa miaka 50.

 

Alisema kama Waislamu walipendekeza Katiba Mpya ya Serikali tatu, itambue uwepo wa Mahakama ya Kadhi ili kusimamia kwa mujibu wa sheria za Kiislamu mambo yanayohusu Waislamu kama ilivyo nchi zingine za Afrika, Asia na Ulaya.

 

Pia alisema walipendekeza rasimu hiyo itambue rasmi siku ya Ijumaa kwamba wafanyakazi na wanafunzi wapewe fursa ya kutosha kufanya ibada kama ilivyo kwa Wakristo.

 

"Tulipendekeza kwamba baada ya Serikali kutambua uwepo wa muumba, isiegemee upande wowote wa dini bali iwepo kwa ajili ya kulinda maslahi ya wenye dini," alisema Katumba.

 

Alisema wanaikumbusha Serikali kwamba Waislamu ni wapenda amani na wapo tayari kusaidia kama wadau wakuu wa amani, lakini wanatahadharisha kwamba amani ya kweli itapatikana tu pale ambapo haki ya wote itapatikana.

 

"Ni muhimu kwa Serikali kuyatafakari kwa kina mapendekezo yetu yakiwemo ya Katiba Mpya ya Serikali tatu," alisema.

CHANZO >> Majira

Je, Una Habari,Picha,Tangazo,Makala,

Hifadhi blog hii kwenye simu yako ili upate habari zote kwa urahisi zaidi

Facebook Blogger Plugin by Kibonajoro