MICHU ASEMA: ‘LIGI KUU ENGLAND BORA KUPITA LA LIGA!’

>>ADAI: “ENGLAND UNAWEZA KUSHINDA UWANJA WOWOTE, SPAIN HUWEZI KUSHINDA NOU CAMP AU BERNABEU!”

>>TETESI UHAMISHO: MAN UNITED YAMLENGA VAN GINKEL, NANI KWENDA ARSENAL??

STRAIKA wa Swansea City, Michu, Raia wa Spain, alietokea Rayo Vallecano Julai Mwaka Jana na kuhamia England kwa Dau la Euro Milioni 2.4, ameungama kuwa Ligi Kuu England ni bora kuliko La Liga ya Spain.

Michu, mwenye Miaka 27, ambae katika Msimu wake wa kwanza tu Nchini England aliipigia Swansea City Bao 22, pia amedai sasa ni rahisi kwa Klabu za England kuwachukua Wachezaji kutoka Spain na wengi huwa na mafanikio makubwa wakihama.

Amesema: “Kwa kila hali, Ligi Kuu England ipo juu kupita La Liga. Ukianzia Mfumo, Mashabiki, Ushindani na hasa nguvu ya Uchumi wake! Klabu yeyote ya England inaweza kumnunua Mchezaji wa Spain kutoka Klabu yeyote isipokuwa Real na Barca tu!”

Aliongeza: “Ndio maana Wachezaji ‘wadogo’ kama Juan Mata, David Silva na Santi Cazorla wamepata mafanikio makubwa mno!”

Pia Michu alikiri: “Hapa England, Timu inaweza kushinda Uwanja wowote ule. Huko Spain ni vigumu sana kwa Timu kushinda Nou Camp au Bernabeu! Ari ya Mashabiki hapa ni ya ajabu! Mashabiki wa Klabu yako wanakufuata katika Mechi zote za Ugenini! Kuna mpangilio mzuri na Mashabiki wanaweza kupanga safari zao Msimu Msimu mzima!”

TETESI ZA UHAMISHO:

Man United wanamtaka Van Ginkel, Arsenal kumchukua Nani?

MENEJA MPYA wa Manchester United David Moyes ameonyesha nia ya kumtaka Kiungo Chipukizi wa Uholanzi Marco van Ginkel anaecheza Klabu ya Vitesse Arnhem na yuko tayari kutoa Dau la Pauni Milioni 15 kumnasa.

Hivi Juzi, Msaka Vipaji wa Manchester United, Jim Lawlor, aliruka kwenda huko Israel kumtathmini Van Ginkel akiichezea Holland kwenye EURO U-21.

Lakini inadaiwa Chipukizi huyo wa Miaka 20 ambae alianza kuichezea Vitesse Arnhem akiwa na Miaka 17 tu pia analengwa na Jose Mourinho ili kumvuta kwenda Chelsea.

Van Ginkel, ambae pia huichezea Timu ya Kwanza ya Holland, hivi Juzi alitwaa Tuzo ya Kipaji cha Mwaka huko Uholnzi, alitakiwa na Mabingwa wa Holland Ajax Amsterdam lakini imebidi wabwage manyanga baada ya kusikia Klabu za England zinamuwinda.

Wakati huo huo, kumeibuka taarifa kuwa Winga wa Man United, Nani, sasa ameingia kwenye Listi ya Arsene Wenger ya kuwa mmoja ya Wachezaji anaowataka hasa baada ya Klabu ya Uturuki Galatasaray kushindwa kumudu kuilipa Man United Dau la Pauni Milioni 8 wakati wao wako tayari kulipa Milioni 6.

Kwa mujibu wa tetesi hizo, Nani, mwenye Miaka 26, atauzwa na Man United kabla Msimu mpya kuanza baada ya kukataa kumpa Mkataba mpya baada ya Mchezaji huyo kugoma ofa ya Mkataba akitaka kulipwa Mshahara wa Pauni 90,000 kwa Wiki.

Nani ndio anaingia kwenye Mwaka wake wa mwisho wa Mkataba wake wa sasa.

Klabu nyingine ambazo zimedokezwa kuonyesha nia ya kumchukua ni Juventus, PSG, Benfica, Monaco na Klabu yake ya zamani ya Ureno, Sporting Lisbon.

Je, Una Habari,Picha,Tangazo,Makala,

Hifadhi blog hii kwenye simu yako ili upate habari zote kwa urahisi zaidi

Facebook Blogger Plugin by Kibonajoro