Jeshi la Somalia laongezewa nguvu na washirika wa Afrika Mashariki, Mashariki ya Kati

Washirika wa Somalia Afrika Mashariki nzima na Mashariki ya Kati wanajitolea kusaidia kujenga upya taasisi za jeshi la Somalia kupitia msaada wa kifedha na kiufundi.

Wanajeshi wa Jeshi la Taifa la Somalia wakitembea wakati wa gwaride la kijeshi karibu na sehemu iliyokarabatiwa ya Wizara ya Ulinzi huko Mogadishu. Misri imeomba kumalizia ujenzi wa jengo. [Stuart Price/AU-UN IST/AFP]
Misri ni nchi ya kanda ya hivi karibuni ambayo imeahidi kusaidia kujenga upya miundombinu ya jeshi la Somalia, ambayo iliharibiwa na miongo miwili ya vita vya wenyewe kwa wenyewe.

"Serikali mpya ya Somalia imedhamiria kukarabati majengo ya jeshi na kuvijenga upya vikosi vya jeshi … kwa kutumia misingi ya kisasa na ya hali ya juu na kwa msaada wa nchi rafiki, ikiwemo Misri, ambayo kihistoria imechangia katika kuvisaidia vikosi vya jeshi vya Somalia," alisema Admiral Farah Qare, kamanda wa vikosi vya majini vya Somalia.

Qare aliongoza kamati ya serikali ambayo ilipokea ujumbe wa ngazi ya juu kutoka Jeshi la Ulinzi la Misri tarehe 4 Juni huko Mogadishu.

"Majengo ambayo Wamisri wanadhamiria kusaidia kujenga upya ni makambi kadhaa ya jeshi na hospitali katika makao makuu na ofisi za Wizara ya Ulinzi ya Somalia," aliiambia Sabahi, akiongeza kwamba mchakato ungeanza katika miezi michache inayokuja.

Kanali mtsaafu Mohamed Ali Moalim, aliyefanya kazi katika jeshi la taifa la Somalia chini ya aliyekuwa Rais Mohamed Siad Barre, alisema vikwazo vya silaha vya Umoja wa Mataifa dhidi ya Somalia kilikuwa kizuizi kwa serikali na kuzuia msaada uliotakiwa kuendeleza jeshi la taifa linalofaa.

"Uamuzi wa Baraza la Usalama la Umoja wa Mataifa wa kupunguza vikwazo vya silaha kwa Somalia kwa mwaka mmoja umezihamasisha nchi rafiki na zile zinazojali suala la Somalia kuisaidia serikali ya Somalia katika jitihada zake za kujenga upya jeshi la taifa," Moalim aliiambia Sabahi.

Jeshi la Somalia linahitaji kufanya uchunguzi kamili ili kutimiza majukumu yake kikamilifu, Moalim alisema.

"Ili kuunda jeshi imara lenye uwezo wa kufanya kazi zake za usalama na kupanua udhibiti wa serikali nchi nzima, ni muhimu kuanzisha amani nchini Somalia," alisema. "Viongozi wapya wanahangaikia kuunda jeshi imara la taifa katika nyongeza ya kufanya kazi kuelekea kuwahusisha wanachama wa wanamgambo wenye silaha ndani ya vyeo vya jeshi la kawaida."

Wizara ya Ulinzi ilieleza kuanza kazi ngumu ya kuliunda upya jeshi mwezi Februari pamoja na uhamishaji wa makazi yasiyo rasmi na watu wasiokuwa na makazi ndani ya nchi kutoka katika nyumba za jeshi na hospitali.

"Wizara ya Ulinzi Somalia imefanikiwa kuhamisha taasisi kadhaa za jeshi, ikiwa ni pamoja na uwanja wa ndege kando ya Uwanja wa Ndege wa Kimataifa wa Mogadishu, kituo cha burudani cha maofisa cha Circolo Ufficiale katika wilaya ya Howlwadag na hospitali ya jeshi huko Hodan," alisema Ahmed Hussein, kaimu msaidizi wa miundombinu katika Wizara ya Ulinzi.

Misri, Uturuki, Sudani na Djibouti zimeahidi kuchangia ukarabati wa taasisi za jeshi, alisema Hussein, ambaye pia yupo katika kamati ambayo inasimamia uhamishaji wa mali za jeshi.

Naibu Waziri wa Kazi za Umma na Ujenzi Mpya Nadifo Mohamed Osman alisema kumekuwa na matakwa mapya ya nchi ya Uarabuni kuisaidia Somalia.

"Misri, Iraki, Saudi Arabia, Djibouti, Sudani, Jamuhuri ya Falme za Kiarabu, Kuwait na nchi nyingine zimejituma kwa kiasi kikubwa, kama vile kufadhili mradi wa ujenzi mpya nchini Somalia na kuwafundisha wanajeshi wa Somalia kama sehemu ya muundo wa jitihada za kusaidia serikali mpya ya Somalia," aliiambia Sabahi.

Wakati wa Mkutano wa wakuu wa nchi za shirikisho Uarabuni, nchi wanachama zilikubaliana kuisaidia Somalia katika siasa, fedha na ufundi kusaidia serikali mpya kuendeleza siasa, kuhamasisha usalama na kusaidia jitihada za ujenzi mpya.

"Iraki imeahidi Dola milioni 15 kutekeleza mradi kadhaa ya ujenzi nchini Somalia ambayo inahusisha ukarabati wa taasisi mbalimbali za serikali na makao makuu ya Wizara ya Kazi za Umma na Ujenzi mpya, pamoja na taasisi za mafunzo na hospitali ya wagonjwa wa akili huko Mogadishu," alisema Osman.

Chanzo: sabahionline.com

Je, Una Habari,Picha,Tangazo,Makala,

Hifadhi blog hii kwenye simu yako ili upate habari zote kwa urahisi zaidi

Facebook Blogger Plugin by Kibonajoro